kuchlphysik

in da frua

trink i mein gaukau

odara an kaffee

mit koida mülch

långsåm übareißens es

de diseina

dåss da ausguss

bei de getränkepackerln

hint weiter sein muass

åls vurn

damits net

ruckweis ausseplätschert

de flüssigkeit

weuil gnua

luft hint eine kånn

und ka vakuum

entsteht

ka sog

wiada eine

durthin

wos gråd aussegrunnan is

nåcha stöll i

die müch zruck

ineiskåstn

(naa, des is obsolet -

des haßt ålt)

ålso inkühlschrank

logischaweis

inwinklscheitl

wo de scharnier

von da tir

weuil durt

beim aufmåchn

am kirzan weg

zwenich zeit

zum ausschwappn

und weuil die tir

scho wiada zua

bevur de müch

a nur denken kånn