kuchlphysik
in da frua
trink i mein gaukau
odara an kaffee
mit koida mülch
de diseina
dåss da ausguss
bei de getränkepackerln
hint weiter sein muass
åls vurn
damits net
ruckweis ausseplätschert
de flüssigkeit
weuil gnua
luft hint eine kånn
und ka vakuum
entsteht
ka sog
wiada eine
durthin
wos gråd aussegrunnan is
nåcha stöll i
die müch zruck
ineiskåstn
(naa, des is obsolet -
ålso inkühlschrank
logischaweis
inwinklscheitl
wo de scharnier
von da tir
weuil durt
beim aufmåchn
am kirzan weg
zwenich zeit
zum ausschwappn
und weuil die tir
scho wiada zua
bevur de müch
a nur denken kånn
spårn håts ghaßn
ka eiskåstn
und ka göd
kaum zum lebn
und scho går net
zum vawönan
åm suntag åba
då håt si di oma
wås einfålln låssn
damit uns wårm wird
und geng die bakterien
håts die müch
aufkocht
dånn håts
de dicke haut di was
si auf da obaflächn
zsåmbraut håt
åbgschöpft und davon
auf den fertign gaukau
in da hochspråch haßt des
sahnehäubchen
zum schluss
håts no zucker drübagstrat
gschmeckt håt des wira schlågobas
åba wemsd des dazöst
dea vaziagts gsicht